„...okkar fingraför vel klístruð úti um allt.“ Ísland og vörumerkið jafnrétti

Markmiðið með þessari rannsókn er að greina hvernig vörumörkun birtist í utanríkisþjónustu Íslands í gegnum jafnréttismál. Einnig er leitast við því að greina hvaða aðferðir eru nýttar við vörumörkun og hvaða þættir valda því að jafnréttismál eru fyrir valinu. Breiður kenningarammi er mótaður úr kenningum smáríkjafræða, kenningum um vörumörkun ríkja, femínísk fræði í alþjóðasamskiptum og dagskrárkenningum Kingdons. Fyrirliggjandi gögn voru skoðuð um rannsóknarefnið ásamt því að tilviksrannsókn var gerð á rakarastofuráðstefnunni. Einnig voru tekin viðtöl við fimm fyrrverandi og núverandi starfsmenn utanríkisþjónustu Íslands en orðræðugreiningu var beitt á viðtölin. Þrjú þemu voru mótuð út frá niðurstöðum orðræðugreiningarinnar; vörumerkið jafnrétti, aðferðir við vörumörkun og framboð og eftirspurn. Niðurstöður rannsóknarinnar voru þær að greina má ómeðvitaða vörumörkun í gegnum jafnréttismál sem birtist einna helst sem rík áhersla á málaflokkinn í allri vinnu utanríkisþjónustunnar, innanlands sem og erlendis. Sértækari vörumörkun á sér einnig stað í formi þess að færa jafnréttisumræðuna til karla, samanber rakarastofuráðstefnuna. Ísland beitir þrem megin aðferðum við vörumörkun, en þær eru: kynjasamþætting, að taka sér dagskrárvald í málaflokknum og alþjóðleg samvinna. Framboð og eftirspurn virðist vera helsti áhrifavaldurinn fyrir því að jafnréttismál eru fyrir valinu sem vörumerki Íslands. Ísland hefur mikið fram á að færa í málaflokknum, hefur skipað sér í framvarðarsveit í jafnréttismálum og vakið athygli á meðal alþjóðasamfélagsins fyrir vinnu sína. Sú athygli hefur hvetjandi áhrif fyrir áframhaldandi vinnu ríkisins innan málaflokksins